இதயம்

இதயம் ஒரு பண்டமோ பொட்டலமோ
பத்திரமாய் பாதுகாப்பாய் பதுக்கிவைக்க
பார்த்துக்கொள்ளென்று கொடுத்துவைக்க
அடமான பத்திரமோ அடுத்தவர் சொத்தோ
அடையாள அட்டையோ அட்சய பாத்திரமோ
திருவிழாக் கூட்டத்தில் வழி தெரியாமல்
தொலைந்து போகும் சிறு குழந்தையோ
தவறவிட்ட கைக்குட்டையோ குடையோ
திருடப்பட்டிடும் திரவியமோ தேட்டோ
சத்திரமோ சிறையோ மதன மாளிகையோ

இரத்தம் சுத்தம் செய்யும் ஓயா யந்திரமோ
கடிகாரம் போல் இடைவிடா தாளமோ
கல்லென்றும் இரும்பென்றும் பொன்னென்றும்
பூவென்றும் பலவிதமாய் உருவக உலா வருமோ
சுமைதாங்கியாய் சுக வங்கியாய் இரு வேடமோ
உறங்கியும் உறங்காமலும் உயிர் உறையும்
ஓருறுப்போ கவிதைகளின் கருப்பொருளோ
எத்தனை எழுதியும் புத்தம் புதிய பாடமோ
படிக்கப் படிக்க புரியாத ஆழமோ வேதமோ
நொடிக்கொரு நிறம் கொள்ளும் வானமோ
கடிவாளமில்லா அடங்காத குதிரையோ
எண்ணப்பொதி சுமக்கும் கழுதையோ

ஐம்புலனை ஆளும் அதிகார பீடமோ
கற்பனைக் கடலாடும் உல்லாச ஓடமோ