சொர்க்கம்

சொர்க்கம் எந்தத் திசையில் இருக்கிறது
உலக வரைபடத்தில் இருக்கிறதா
கண்டவர் விண்டதுண்டா திரும்பா தேசமா
நன்னெறி நடக்க நல்லவர் முன்னாளில்
சொன்ன ஆசை வார்த்தையா ஆறுதலா
கற்பனை உலகெனில் கவிஞர் அறிவாரே
படைப்பவர் யாவரும் அனுபவிப்பாரே
குழலும் யாழும் அதை மிஞ்சிய மழலை
சூழ்ந்த பயம் வேதனை நீங்கிய விடுதலை
ஐம்புலனில் தனியாய் மொத்தமாய் சுகம்
அதிலும் எத்தனையெத்தனை விதம்
ஆளுக்கு ஆள் மாறும் கிடைக்குமிடம்
அகராதியில் பொருள் உணர்த்தாத இடம்
தேடத் தேவையில்லாத கைப்பொருள்