இடைவெளி

 இரயில் வண்டியோடும் இருப்புப்பாதையில் 
கணக்காய் ஓர் அளவிலே வகுத்தார் 
சீராய் முழு தூரத்துக்கும் இடைவெளி- 
தடம் புரளாத துரித சுகமான பயணம் 

சூரிய மண்டலத்திலே கிரகங்களிடையே, 
பூமிக்கும், சந்திரனுக்கும் இடையே 
அளவான பிரபஞ்ச இடைவெளி- 
ஈர்ப்பின் எல்லை தாண்டாத நலம் 

அந்தரங்கம் அறிந்தவரேயாயினும் 
அனைத்தும் பகிர்ந்தவராயினும் 
இல்லறத்திலும் வேண்டும் இடைவெளி 
இருவர் உறவும் தொடர்ந்து மணந்திட 

பஞ்சுக்கும் நெருப்புக்கும் இடையே 
பயிர் நாற்றுக்களின், மரங்களின் நடுவே 
காந்தத்தின் எதிர் துருவங்களிடையே 
இடைவெளி-பயனும் பாதுகாப்பும் உண்டு 

பிள்ளைப்பேறுகளிடையே இடைவெளி- 
மக்கட்தொகை சுருக்க அரசாங்க யோசனை 
சாலையில் வாகனங்களிடையே இடைவெளி 
விபத்தைத் தவிர்த்திட ஒரு நல்ல வழி 

விதை வெடித்து முளைத்து மரமாகிடவும் 
பூத்து காய்த்து கனிந்து குலுங்கிடவும் 
உயிர்கள் பழுத்து சருகாய் உதிர்ந்திடவும் 
கட்டாயம் இருக்கிறது கால இடைவெளி