பட்டிமன்றம்

மனதில் நடக்குது பட்டிமன்றம்
கெஞ்சுவதா மிஞ்சுவதா
கொஞ்சுவதா குழைவதா
சாம தான பேத தண்டத்தில்
இந்தக் கணம் இவனை வெல்ல
துரிதமாய் துணிவாய் முடிவெடு

கடிகாரம்

கடிகாரம் நின்றுவிட்டதா
எத்தனை தரம் பார்ப்பது
கடினமானது காத்திருப்பது
கடிகார முள் பறக்கிறதே
அதற்குள் பிரிய வேண்டுமா
கடிகாரம் என்னவோ ஒன்றேதான்

நாணம்

நாய்க்கு வேணும் நாணம்
நங்கைக்கு அல்லவாம்
புரட்சிப்புலவன் வாக்கு
பிழையாய் போனதின்று
அர்த்தமும் அனர்த்தமும்
அறிந்திட ஒரு வாய்ப்பு

சாதிக்கும்

காத்திருப்பதில்லை
கண்ணீர்த் துளிகள்
கன்னத்தில் வடியும்
காரியம் சாதிக்கும்

பயணம்

எல்லாம் தெரிந்தவர் இல்லை
எல்லாம் புரிந்தவர் இல்லை
எல்லாம் உணர்ந்தவர் இல்லை
எல்லாம் கண்டவர் இல்லை
எல்லாம் வென்றவர் இல்லை
எல்லாம் இன்பமயந்தான்
இயற்கையோடு நடந்தால்
இடரின்றி பயணம் முடியும்

பல்லவி

அம்மாவின் கைமணம்
மீனானம் தேனானம்
மனைவியும் நிபுணிதான்
ஆனாலும் ஒரு படி கீழே
மருமகளே மருகாதே
மாமியார் ஆனதும் பார்
மகன் பல்லவி தொடர்வான்
மருமகள் பல்லைக் கடிப்பாள்

அறிவு

அறிவு ஒரு ஆயுதம்
செதுக்கு உன் வாழ்வை
செம்மையான முறையில்
சீரான நேர்பாதையில்
விலகட்டும் அஞ்ஞானம்
விரியட்டும் கண்ணோட்டம்
வேண்டும் ஆக்கபூர்வம்
வேண்டாம் வீண் ஆராய்ச்சி
விளைவுகளை நினை
விழிப்புடன் முன்னேறு

ஆசை

சமமா சரிசமமா நிசமா
உமையொரு பங்கனா
உடலிலும் மனதிலும்
உரிமை கொடுப்பவனா
ஒருவன் வருவானா
ஒவ்வொருத்தியின் ஆசை

தெரியவில்லை

தெரியவில்லை
இரவா பகலா
இனிப்பா கசப்பா
இசையா இரைச்சலா
இடரா உதவியா
இதெல்லாம் இலக்கியமா
இத்தனை சுதந்திரமா
இன்னும் என்னென்னவோ
இருட்டுது வெருட்டுது
இணையம் தஞ்சம்

மீண்டும்

சந்தோஷத் தருணங்களில்
விசேஷ கணங்களில்
விழாக் காலங்களில்
விகசித்த முகங்களில்
வெளிச்சம் தெரிகிறதே
வெள்ளி முடி மின்னுகிறதே
வெள்ளைச் சிரிப்பு பூக்கிறதே
புதுசாய் மீண்டும் பூக்கிறதே
புகைப்படங்களாய் பிடித்ததை
பார்க்கின்றபோதெல்லாம்

தெளியுமா

டொய்ங்க்
தன்னிச்சையாய் தந்தியை மீட்டுகிறது விரல்
மேகக்கூட்டமாய் உருமாறி அலையும் மனம்
எண்ணாத எண்ணமெல்லாம் எண்ணி தடுமாறும்
எதை எடுப்பது எதை விடுவது தீராத குழப்பம்
மதில் மேல் பூனையாய் நிற்கும் ஊசலாட்டம்
குழம்பிய குட்டை தெளியுமா மீன் தெரியுமா

பிம்பம்

பிம்பம் நிசத்தின் பிரதிபலிப்பு
என்பதுதான் சராசரி கணிப்பு
இருக்கு கற்பனையின் பங்களிப்பு
கண்ணாடியில் என் முகம் அழகு

வலி

ரணத்துடன் கைகோர்த்திருக்கும் வலி
ஆறிய பின்னும் மிச்சமிருக்கும் வடு
ஆற மறுக்கும் ஒரு சில காயங்கள்
பச்சைப் புண்ணாய் பல கசப்புகள்
உள்ளிருந்து வாட்டும் வேதனைகள்
ஏமாற்றும் முகத்தின் புன்சிரிப்புகள்

என்ன

என்ன என்று தெரியாத வரை ஆர்வம் இருக்கும்
ஆராய்ச்சி தொடர்ந்திருக்கும் சுவையிருக்கும்
அதனால்தானோ அளவற்ற மர்மங்கள் புதிர்கள்
இயற்கையில் வாழ்கையில் மனதின் மாற்றங்களில்

திருவிழா

வைராக்கியம் தொலத்த ஓர் இனம்

வெக்கமில்லாமல் குடிக்குது

மகிழ்ந்தாலும் குடிக்குது

துக்கத்திற்கும் குடிக்குது

உளருது உருளுது பிறழுது

குடும்பஸ்தன் குடிக்கிறான்

எத்தனை நாள் அடி வாங்குவாள்

தனியே பாரம் சுமக்கிறாள்

தந்தை நிழலில்லா குழந்தைகள்

கல்லூரி வாலிபன் குடிக்கிறான்

புதிய கலாசாரம் படைக்கிறான்

பள்ளிச் சிறுவன் ருசிக்கிறான்

என்ன மிஞ்சும் சாதனை களத்தில்

சோதனை இது கொடியது

குடியை வளர்த்த ஓர் அரசு

தொடர்ந்து காக்கும் அடுத்த அரசு

வற்றாத ஊற்றாக வருமானம்

கோடிகளில் கொட்டிக் கொடுக்க

இலவசங்கள் அள்ளி வழங்க

பெருகியோடும் மதுக் கடலில்

பாழாய் போகும் தலைமுறைகள்

யாருக்கு இங்கு அதில் அக்கரை

யாவரும் அறிந்ததே இச்சீர்கேடுகள்

ஆற்றை கண்டேனா அழகரைச் சேவித்தேனா

என்றிருக்க முடியாத மதுரைக்காரி

ஊரெங்கும் திருவிழா விமரிசையாய்

நாகரிகம்

பார்க்கிறேன் பாரெங்கும்
பகைவரிடம் நட்பு
பளீரென்ற சிரிப்பு
பொதுவிடத்து நடிப்பு
பரிவான விசாரிப்பு
போலியான பூச்சு
பொய்யான பேச்சு
பழகும் பாங்கு
பெயர் நாகரிகம்
போற்றலாம் இதை

செல்லமாய்

இளநீர் தண்ணி இளைய மகள்
ஏழாவதாய் பிறந்த என் அன்னை
மகிழ்ந்து சொல்வது செல்லமாய்
தந்தையிடம் சீராடியதை எண்ணி

கிழடு

வீடு போ போங்குது
காடு வா வாங்குது
பெருசுகள் சொல்லில் அலுப்பு
பொழுதுக்கும் பேசும் புரணி
மனம் முழுக்க வினை வம்பு
மரியாதை தகும் வயது
அதனால் தப்பிக்கும் தவறு
இப்படியும் இருக்கு சில கிழடு

இயல்பாய்

இல்லை இன்று இலக்கணம்
இயல்பாய் மலர்ந்து காய்த்து
இனிப்பாய் கனிந்த காட்சி
பொருத்தமான பருவத்தில்
பூக்காத மணக்காத சூல்கொள்ளா
பொருள் தேடும் பெண்பூவில்
இருக்கிறதா ஈர்க்கும் அழகோ
இனம் வளர்க்கும் சாரமோ

காலம் இது புதிது

ஆட்டம் போட்டோம்
அன்று பாட்டி வீட்டில்
கோடை விடுமுறையில்
கூட்டமாய் உறவினர்
கற்றோம் பல விஷயம்
கூட்டமில்லை இன்று
கலையும் திறனும் கற்பிக்க
களமிறங்கும் மையங்கள்
காசினை குவித்திட
காலம் இது புதிது
குழந்தைகள் வளரும்
களமும் சவாலானது

இன்றைய அம்மா

அப்பாவுக்கு இன்று தாய் வேஷம்
வக்கணையாய் சமைத்து ஊட்டி
விளையாடிக் களித்துப் பின்னே
கதை சொல்லி தூங்கவைத்து
முழு நேர பிள்ளை வளர்ப்பு
பொறுப்பான வீட்டு பராமரிப்பு
இதுவும் புருஷ லட்சணமென்று
இன்றைய அம்மா காட்டுகிறாள்

மோகினியே

சாய்ந்ததுவே சாம்ராஜ்யம்
சாகச ராணியின் சிரிப்பில்
பெண்பால் கவர்ச்சி வீழ்ச்சியா
பலியானார் விசுவாமித்திரரும்
சுட்டுவிரலில் ஆட்டி வைக்க
சுண்டெலியாய் ஆணை மாற்ற
வரம் வாங்கி வந்தவள்தான்
வரலாறு உரைக்கும் உண்மை
மோகினியே அமுதினைத் தா
மோகத்தால் ஆணை அழிக்காதே

பார்வையின் கோணம்

புதிரா இருக்கேன்னு
புத்திசாலி நினைச்சான்
பழம் ஏன் கீழே விழுது
புவி ஈர்ப்புன்னு புரிநது
பார்வையின் கோணம் தருது
பதிலை பொருளை பூரணத்தை

நம்ப முடியவில்லை

நினைவுத் திரையில் நிழலாடிய உருவமோ
தவழும் அழகிய கொழுக் மொழுக் குழந்தை
நேரில் நிற்கிறான் மீசையுடன் ஆறடியில்
நம்ப முடியவில்லை நான் கிழவியானதை

போச்சு

போச்சு போயே போச்சு
பூவும் பொட்டும் புருவமும்
பட்டு பாவாடை புடவையும்
கருநாகம் போல் சடையும்
நளினமான நடை அழகும்
பெண் அடையாளமத்தனையும்

பிள்ளைகள் போல்

சிரிப்பன்றோ விதை போட்டது
திரௌபதி சிரித்தாள் முன்னம்
பாரதப் போரில் அது முடிந்தது
ஏளனம் எள்ளல் பரிகாசமில்லாமல்
கள்ளம் கலக்காமல் சிரித்தால்
பிள்ளைகள் போல் குதூகலந்தான்

தேவதைகள்

தேவதைகள் பெரியவர்க்கு பரிச்சயமில்லை
சிறுமிகளுக்கோ நெருங்கிய தோழிகளன்றோ
மாற்றாந்தாயும் அவள் மகள்களும் தடுக்க
அதைத்தாண்டி மன்னர் அளித்த விருந்துக்கு
எலிகள் பரிகளாகி பூசணி சாரட்டை இழுக்க
அழகிய பதுமையாய் அதிலமர்ந்து சென்று
சின்டிரல்லா இளவரசன் மனம் கவர்ந்தாடி
கண்ணாடி செருப்பின் துப்பிலே இறுதியில்
மணம் முடித்து அரண்மனை புகுந்த கதை
அறியாத சின்னச் செல்லங்கள் உண்டோ

பணி

வெறியாட்டம் போடும் சூறாவளி காற்று
வேரோடு மரங்களை பிடுங்கும் மதயானை
ஊவென ஊளையிடும் ராட்சத ஓநாய்
வெட்டும் மின்னலோடு கொட்டும் மழை
இயற்கையின் ஊர்த்தவ தாண்டவமோ
அழித்து கழித்து துடைக்கும் பணியோ

ஆர்வம்

ஆர்வம் அடிக்கடி கோளாறாகுது
அத்து மீறிப் போக துடிக்குது
மூடிய அறைக்குள் எட்டிப்பாக்குது
தடை செய்யப்பட்டதை நோங்குது
ஆப்பிளைக் கடித்த ஆரம்பமே
விபரீதமாய் இன்றும் தொடருது

பக்குவம்

நன்மை -குவியும் கோடிகள்
உலகளாவிய ஒளிக்குளியல்
நீல நிறம் வெல்ல வேண்டி
விரதம் இருக்காத குறை
முட்டாள் பெட்டி முன்னமர்ந்து
முழு முனைப்போடு ஆதரித்து
நடுநிசியில் இனிப்பு வழங்கி
தீபாவளி கொண்டாடி வெடித்து
மதுவை பீச்சியடித்து மகிழும்
முகங்களைக் கண்டு பசி மறக்கும்
பாமரப் பக்குவம் வாய்க்கலையே

உடற்பயிற்சி மையம்

தோன்றியது மனதில் துணிவு
மறைந்தது மருகும் தயக்கம்
நடை பழக அருகில் இடமில்லை
சாலையில் போக்குவரத்துத் தொல்லை
கொழுப்பை குறைத்தே ஆக வேண்டும்
கை நீட்டி வரவேற்றது அருகிருக்கும்
மகளிர் உடற்பயிற்சி மையம் ஆகா
இனி அழகும் ஆரோக்கியமும் எனதே

ஏமாற்றம்

ஏமாற்றம் தரும் பாதிப்பு இரண்டு
முகம் கூம்பி சோகம் மனதுக்குள்ளே
ரத்தக்கொதிப்பு என்றொரு நிகழ்வு
தானாடாவிட்டாலும் ஆடும் சதையாய்
புத்தியை தாண்டி வரும் விளைவு
வைத்தியம் வேண்டும் தீரா வியாதி

வித்தியாசமாய்

நேரங்களும் தான் நகருது வித்தியாசமாய்
றெக்கை கட்டிக்கொண்டு சில சமயங்களில்
நத்தை வேகத்தில் பிற பொழுதுகளில்
நின்றே கூட போகிறது அதிசயமாகவே

நரகம்

வேண்டுமென விரும்பிய மாற்றமிதுவா
விபரீதமான விசித்திரமான விளைவா
ஆண்டாண்டு காலமாய் இங்கு ஓர் வழக்கம்
அடிமையாய் மருமகளை நடத்தும் பழக்கம்
ஆண்மகனை பெற்றவளின் அகந்தை அன்று
அடக்கியாண்டது தன் வீட்டுக்கு வந்தவளை
அன்னையிடம் நல்ல பெயர் வாங்குவாளா
அப்பாவி புதுக் கணவன் மிக வருந்தினான்
ஆனாள் பெற்றவளின்று படுவதை பார்க்கிறான்
அன்று அந்தியில்தான் கொடுமை மாமியாருக்கு
ஆரம்பம் நரகம் இன்று மாமியாரனவுடனேயே