வெள்ளித் திரையினில்

வலித்தது மிகவும்
வன்முறை பார்க்கையில்
வினயம் வெல்கையில்
வஞ்சம் சிரிக்கையில்
விரிவான விதத்திலே
வெள்ளித் திரையினில்
வக்கிரம் விரிகையில்
விடமே இவ்விருந்து

லட்சணமில்லை

சொல்லலாமா உண்மையை
காப்பி நன்றாயில்லை
ஒப்பனை சரியில்லை
பையில் பணமில்லை
என் தாய் நல்லவள்
இப்படி போட்டுடைப்பது
தனக்கு லட்சணமில்லை
நல்லதே நடக்காது
பொறுமை அவசியம்
புருஷனுக்குத் தெரியும்

வித்தகன்

தலைவனானான் பழங்காவிய பாணியில்
விசிலடிக்கும் நண்பர் குழாம் உசுப்பவே
பள்ளிக்கூடப் பிள்ளையை தொடர்ந்தான்
அயராது மாறன் கணைகளை தொடுத்தான்
அருமையான பல நவீன வழிகளின்றிருக்க
அரும்பிய மீசை வயதுக்கு வந்ததைச் சொல்ல
விளையாடுகிறான் பிருந்தாவனக் கண்ணன்
வீரமான விவரமான வித்தகன் களிப்புடனே

சொந்தம்

சொந்தம் சுருங்கித்தான் போனதின்று
ஒரு பிள்ளை பெறுவதே பெரும்பாடு
அண்ணா தங்கை அத்தை பெரியப்பா என்ற
ஆலமரக் கிளைகள் விழுதுகள் தொலைந்து
பனை மரங்கள் ஆகி நிழலின்றி வாடுது
பாலைவனமாய் புதிய சமுதாயம் ஒன்று

மனிதம்

மனிதம் என்றும் புதிர்தானோ
மாட மாளிகை பிடிக்காதோ
மண் குடிசையில் தழைக்குமோ
கணக்குப் போட தெரியாதோ
அடித்த கையை வருடுமோ
அழுத கண்ணை துடைக்குமோ
உடுக்கை இழந்தவன் கை போலே
ஒடி வந்து உதவுமோ உருகுமோ
பலனை எண்ணாத பரோபகாரமோ
என்றும் ஒரு கண்ணோடு சேர்ந்தழும்
மறு கண்ணின் இயல்பின் குணமோ
வற்றாத உயிர்மையின் ஊற்றோ

கர்வம்

தெரியாதா சாத்திர நூல்கள் உரைகள்
வேத பாடங்கள் மேதாவி விளக்கங்கள்
வினவினான் பண்டிதன் பாமர படகோட்டியை
அவனோ படகில் பழுது நீந்த்த்தெரிந்தால்
உம் உயிர் உமக்கு என்று அறிவித்தான்
அந்தோ மூழ்கியது கர்வம் பரிதாபமாய்

முழுதாய்

வா வழி காட்டுவேன்
தா பெருக்கித் தருவேன்
சொல் விளங்கிக் கொள்வேன்
பார் திறந்து வைத்தேன்
பாதியாய் நானிருப்பேன்
முழுதாய் மாற்றுவேன்

திரிசங்கு சொர்க்கம்

மனம் இப்படி துவழுமா
சோகக் கடலில் மூழ்குமா
நிலை கொள்ளாது தவிக்குமா
தரையில் மீனாய் துள்ளுமா
கண் துயிலாது வெம்புமா
கருகிப் போகுது பயிரு
தொக்கி நிக்குது கவிதை
காத்துக்கிடக்கு மெயிலு
தொங்கிப்போகுது தொடர்பு
தொலைத்தொடர்பே காப்பாத்து
தொல்லை தீராத அலையா
திரிசங்கு சொர்க்கம் எனதா

நதி

அப்படி ஒரு கனவு
எப்படி வந்ததெனக்கு
இப்படி ஒரு மலைப்பு
மறுபடி வ்ருமா நேற்று
பழகிய பழைய வீடு
பசுமையான நினைவு
நாடோடியாய் ஓடிய நதி
நெருங்கிவிட்டது கடலை

விடியும்

உண்டு உண்மை என்று ஒன்று
ஓரமாய் அது நின்று கொண்டு
ஊமையாய் வேடிக்கை பார்க்க
வேடம் பூண்டு பொய்யதுவும்
பலரும் பார்க்க ஆட்டம் காட்டி
பாய்ந்து ஆடி ஓய்ந்த வேளை
பொல பொலவென விடியும்

எச்சரிக்கை

நெருடலாக உறுத்திடும்
பல்லுக்குள் துணுக்காக
சாதத்தில் சிறு கல்லாக
கண்ணியமாய் பேசும் கனவான்
பார்வையில் ஒரு கள்ளம்
பூடகமாய் வரும் எகத்தாளம்
பெண்ணே தேவை எச்சரிக்கை

வசியம்

அவள் பைத்தியமாகிப் போனாளே
புத்தியை முழுதாய் தொலைத்தாளே
பற்றை விட வேண்டிய வயதிலே
பற்றிக்கொண்டாளே போதை ஒன்றை
பழுதென்றால் தடங்கலென்றால்
பொழுது போகாமல் தவிப்பாளே
பறி கொடுத்த நிலை கொள்வாளே
புது யுக வசியம் இந்த இணையமே

தன்னம்பிக்கை

தன்னம்பிக்கை தருமே
தடை வெல்லும் வேகம்
தணியாததோர் உற்சாகம்
திருவினையாக்கும் ஆக்கம்
துணையாய் கையிலிருக்க
துவழ்வதோ தடுமாறுவதோ
தோணியின் துடுப்பாயிருக்க
தொடுவானம் கூட தூரமோ

ஞானக்குருடனாய்

தோன்றியது என்னவோ சொர்க்கபூமியாகத்தான்
வனங்களும் வளங்களும் பொங்கி வழிந்தோட
நீரும் நிலமும் கடலும் மலையும் உயிர்களுமாய்
ஆதாமும் ஏவாளும் பல கோடியாய் பெருகிய பின்
ஆணவமும் சுயநலமும் பெருக கேடுகளும் பெருக
இயற்கையோடு இயைந்து வாழாத மனிதன் இன்று
ஞானக்குருடனாய் அழிகிறான் அடக்கியாழ நினைத்த
அந்த அரிய சக்திகள் அடங்காமல் சீறி எழுவதனால்

மறந்து போகுதே

நினைவில் நிற்குது பழைய செய்யுள் வரிகள்
பால்ய வயதில் நடந்த ஆயிரம் சம்பவங்கள்
பழகிய பல்வேறு முகங்கள் குரல்கள் இடங்கள்
மறந்து போகுதே நேற்று கேட்டது பார்த்தது

அந்திம பொழுதுகள்

கலங்கின நினைவுகள்
கலைந்தன கனவுகள்
விலகின திரைகள்
விழித்தன கண்கள்
நீண்டன நிழல்கள்
அந்திம பொழுதுகள்

மாயாலோகம்

வாழ்க இந்த மாயாலோகம்
வலம் வர எத்தனை வழி
வசதியாய் ஒரு முகமூடி
வேண்டாம் உண்மை முகவரி
வளரும் முகம் பாரா நட்பு
சோழனும் ஆந்தையாரும் தூசு

அப்படித்தான்

அப்படித்தான் நடக்கவேண்டும் என்று இருந்தால்
அப்படித்தான் நடந்தே தீரும் நிச்சயமாய்
அப்படித்தான் நடக்குமென்று சொல்லும் உள்ளுணர்வு
அதிசயமாய் சிலருக்கு வாய்த்த ஏழாம் அறிவு
அப்படித்தான் நடக்கவேண்டும் என்று எண்ணுவது
அப்பட்டமான பிடிவாதம் அல்லது பேராசை
ஆளப்பிறந்தவர்கள் திறமையாகும் பல நேரம்
ஆக்கமுடன் முயல்பவர்கள் சாதனை பெருகட்டும்

நலன்

நலன் என்பதை நினைத்தால்
நல் விவேகம் இருந்தால்
பயிருக்கு வேலி வேண்டும்
காத்திருக்கு வெள்ளாடு
நட்பிற்கு வரம்பு வேண்டும்
கள்ளம் புக வழியிருக்கு
ஆசைக்கு எல்லை வேண்டும்
போதுமென்பது பொன் மருந்து

காற்றாய் மனம் பறக்கையில்

கொஞ்சுவேன் கூந்தலை கலைக்கும் தென்றலை
கோலத்தின் மேல் ஓடி அழிக்கும் குட்டி நாயை
கழுத்தைச் சாய்த்துப் பார்க்கும் குருவியை
கடையில் வாங்கி வந்த புதுச் சேலையை
கையில் கலகலக்கும் கண்ணாடி வளையலை
காற்றாய் மனம் பறக்கையில் இன்பமயமே

ஏப்ரல் ஒன்னு

நிம்மதி தொலைந்தது
ஏக்கம் மிகுந்தது
பொறாமை பிறந்தது
ஆடவன் மனதினில்
மார்ச் எட்டு உலகிலே
பெண்ணை கொண்டாடும் நாள்
ஆணுக்கு ஒரு தினம்
ஒதுக்கினால் ஆகாதோ
வருத்தம் வேண்டாமடா
ஏப்ரல் ஒன்னு உனக்குத்தான்

பெண்

பாராட்டு பெண்ணின் பிறப்புரிமை
ஏவாள் எழுதினாள் முதல் பக்கம்
தொடர்கிறது சரித்திரப் புத்தகம்
எழுதுகோல் பெண்ணின் கையில்
என்றும் மாறாத வழக்கம்
கணிக்க முடியாத கணக்கு
எப்போது எங்கு என்ன நடக்கும்
எப்போதும் தீர்மானிப்பது பெண்

சக்தி

நிரம்ப மாற்றம் உலகெங்கிலும்
எங்கும் நிறைந்த சக்தியின்று
தொழுவில் கட்டிய மாடில்லை
துணிவில் துடிப்பில் ஈடில்லை
அறிவுச்சுடர் மிளிர்கிறது
அதிசயங்கள் நிகழ்கிறது
விடாத முயற்சியுண்டு
விழாத தைரியமுண்டு
குடத்தில் இட்ட விளக்கின்று
குன்றில் நின்று எரிகின்றது
தொடாத துறைகளில்லை
எட்டாத உயரங்களில்லை
எக்களமும் மிரட்டவில்லை
எத்தளமும் எட்டாததில்லை
சாதிக்கும் தங்க மங்கையர்
போதிக்கும் அரிய சமத்துவம்
அடுத்த கட்ட மனித நாகரிகம்
அழகாய் அரங்கேறும் நாளிது

காலமே கலிகாலமே

இங்கே இப்போது நடப்பதென்ன
வேங்கை ஆணை கண்டு பெண்மான்
வெருண்டது பழைய கதை அவளோ
வெகுண்டு எழுந்து வேங்கையாகி
விரட்டுகிறாள் அடக்கிய ஆணை
மானினும் மிரண்டு நிற்கிறான்
மலங்க மலங்க விழிக்கிறான்
மறந்தும் சமையல் கற்காத
மனையில் தங்க விரும்பாத
மழலையை மடியில் கொஞ்சாத
சாட்டையை சொடுக்கும் சர்க்கஸ்காரி
கொழுகொம்பை உதறும் கொடியின்று
உலக மகளிர் தினத்தில் தப்பாது
கொடி பிடிக்கும் கொள்கையெல்லாம்
கொன்றுபோடுமோ பெண்மை வரத்தை
மாதவத்தை மாண்புமிகு மகுடத்தை
மாற்றுமோ மரபணு தாய்மையை
ஆணும் பெண்ணும் ஆளத் துடிப்பதோ
அழகாய் இணைந்து வாழ நினைப்பதோ
அடுத்த தலைமுறை தலைவிதிப்படியே
காலமே கலிகாலமே கண்ணாடியாய்
காட்டு கண்ணுக்கு உறுத்தாத காட்சி
கல்லடி கிழவிக்கு கிடைக்குமென்றாலும்
சொல்லாமல் இருக்க முடியவில்லையே

வேண்டும்

வீரியம் விதைக்கு
வீரம் மாந்தர்க்கு
விவேகம் பெரியோர்க்கு
வேண்டும் கட்டாயம்

உனக்கே உனக்கு

நீ நினைத்ததெல்லாம் நடந்தது
நடந்ததெல்லாம் இனித்தது
இனித்ததெல்லாம் தொடர்ந்தது
தொடர்ந்ததெல்லாம் உனக்கே உனக்கு
பலபல என விடிந்தபின் தூக்கமா
படவா எழுந்து பல்லைத் தேய்

ஆராய்ச்சி

நன்றி கேட்கிறது எங்கெங்கும்
நல்ல நாகரிகந்தான் பழகிட
உள்ளத்திலிருந்து வருகிறதா
உதட்டிலிருந்து உதிர்கிறதா
உண்மை அதிலே இருக்கிறதா
யந்திரம் போல் சொல்வதுதானோ
நழுவிவிட ஒரு யுக்திதானோ
ஆராய்ச்சி வேணா அம்மகிழ்ச்சிக்கு

அறுபதுகள்

இல்லையே எல்லைகள்
இயல்பான ஆசைகள்
தொடராது தொல்லைகள்
துடிப்பான அறுபதுகள்

இளைய மனம்

பூத்திருந்தது புதிய காலை
காத்திருந்தது செய்தித்தாள்
தித்தித்தது குடித்த காப்பி
ஈர்த்தது குறுக்கெழுத்துப் புதிர்
திறந்தது இணையப் புத்தகம்
தொடர்ந்தது குறுக்கெழுத்துப் பதிவு
அடுத்தது பண்ணை விளையாட்டு
விளைந்திருந்தது இரவு விதைத்தது
சேர்ந்திருந்தது பரிசுக் குவியல்
திளைத்திருந்தது இளைய மனம்

வேண்டினேன்

நன்றை ஒதுக்கி
நகைக்கும் குணம்
நாகரீக மோகம்
நடுங்குது மனம்
நாளும் வளருது
நச்சு விருட்சம்
நடக்குது கூத்து
நாராச பாட்டு
நிலை தடுமாறுது
நாளைய தூண்கள்
நிலையாது போகட்டும்
நிழலாய் மறையட்டும்
நிலவின் கிரகணம்
நிதமும் வேண்டினேன்

மழை

நிற்கும் என காத்திருந்தாள்
நினைக்காமல் பொழிந்த மழை
நனைய ஆசைதான் மனதில்
நிறைவான புதிய உணர்விது
கட்டிப்போடும் கடமைகளிருக்க
காதலை கடந்து போகிறாள்