வண்டு

 வண்டு தான் காட்டும் சமத்துவம்
உண்டோ அதற்கு நிற பேதம்
தேடித் தேடி தேனை உண்ணும்
பரப்பும் பூமி எங்கும் மகரந்தம்
ஓயாத உழைப்பதன் ரீங்காரம்
சேவைகெடுத்த ஒரு அவதாரம்

மலரும் நினைவுகள்

 மனதுள் மணக்குது
மதுரை மருக்கொழுந்து
மல்லிகை பூச்செண்டு
மருதாணி மனோரஞ்சிதம்
பவளமல்லி பாரிஜாதம்
ஜாதிமல்லி செண்பகம்
முகரத் திகட்டா கதம்பம்
பொத்தி வைத்த பொக்கிஷம்
மலரும் நினைவுகள் தரும்
பள்ளி மாணவர் சந்திப்பு

புலம்பல்

 போனதாம் பொற்காலம்
பெருசுகளின் புலம்பல்
புரியவில்லை புது கருவிகள்
பிடிக்கவில்லை புது அலைகள்
பழசை பற்றிக்கொண்டு 
புதியவற்றை வசை பாடி
படுவது அதிகமா
படுத்துவது அதிகமா

பரிணாமம்

 காதலிலே காண்கிறேன் பரிணாமம்
கடக்கும் அது பல வளர் கட்டங்கள்
பருவம் எட்டிய இளம் வயதினில் 
பூவாய் மொட்டொன்று மலர்ந்து
காலூன்றி வாழத் துவங்கியபின்
காயாய் அது மெல்ல கடினப்பட்டு
கலந்து ஒன்றான முதுமையில்
கனியாய் கடைசியில் இனிக்கும்

விவேகம்

 ஆம் நீதான் முடிவெடுக்க வேண்டும்
உனக்கொரு துன்பம் உடலில் நோவு
ஆ என அலறி ஊரை கூட்டுவாயா
இவ்வலி யாருக்கும் வந்ததுண்டோ
புலம்பி பலத்தை போக்குவாயோ
போதாத காலத்தை நோவாயோ
பல்லைக் கடித்து பொறுப்பாயோ
போய்விடும் இதுவும் கடந்து என
தைரியமாய் வலி தாங்குவாயோ
பொறுப்பாய் விதியை சுமப்பாயோ
வலியை வாங்கிக்கொள்ள முடியுமோ
வருந்தும் சுற்றம் மேலும் வருந்தவோ
விவேகம் கண்டு வியந்து உருகவோ
விரைந்து நீ முடிவு செய்ய வேண்டாமோ

இந்நொடி

 போகுமென்று தெரியும்
அழகும் இளமையும்
ஆயுளும் ஆரோக்கியமும்
அதிலில்லை அதிசயம்
ஆனந்தமான இந்நொடி
அதன் பொருள் கோடி

அறிவில் மயக்கம்

 எனக்குப் படுகிறது இதெல்லாம் தவறென்று
ஒத்துக்கொள்ளவில்லையே இவ்வுலகம்
தின்னக்கூடாததை தினம் தின்கிறார்கள்
செய்யக்கூடாத பலவும் செய்கிறார்கள்
இத்தலைமுறையின் அறிவில் மயக்கம்
இதை சொல்லிட எனக்கில்லை தயக்கம்