அமரத்துவம்

 அமிர்தம் கடைந்தெடுக்க
அசுரர் உதவிடவேண்டும்
அதில் பங்கு மட்டுமில்லை
அநீதியின் அமரத்துவம்

எங்கே

 சத்தியம் போற்றும் அரிச்சந்திரன்
பிறன் மனை நோக்கா சீதாராமன்
கொடுத்து கை சிவந்த கர்ணன்
பிரம்மச்சர்யம் தழுவிய பீஷ்மன்
தேடுகிறேன் எங்கே அம்மானுடன்
இருக்கிறானா அது போல் ஒருவன்

தகவல்

 பாட்டெழுத அன்று பனை ஓலை
பரிசளித்து குளிர்ந்தது மன்னர் குலம்
பின்னாளில் காகித உபயோகம்
படித்திட பாதுகாக்க குதூகலம்
தட்டித் தடவி இன்று தகவல் பிறக்கும்
எட்டாத விண்ணிலுலகம் பறக்கும்

பாழும் கிணறு

 தன்னால் எடுத்த முடிவுதான் என்றாலும்
தனக்காக பெற்றோர் தேர்ந்தெடுத்தாலும்
திருமணம் என்னும் பந்தம் பாழும் கிணறு
எங்கும் உலா வருதிந்த அரியதோர் கூற்று

அம்மம்மா

 வலிக்கலாச்சே கையும் காலும்
கண்ணிப்போச்சே கன்னமிரண்டும்
விட்டுப்போச்சே குறுக்கெலும்பும்
சிவந்துபோச்சே தூங்காத கண்ணும்
அம்மம்மா அன்றவன் காதல் மோகம்
இன்றோ அவனிடம் மிருக மூர்க்கம்

சுவை

 வாழ்வில் சுவை கூட்டுவதெது
உப்பும் உரைப்புமாவது யாது
சப்பென்றில்லாமல் செய்வதெது
அடுத்து நடக்கப்போவதென்ன
என்பதின் மர்மமே அதிசயமே
நல்லதோ கெட்டதோ வரட்டுமே 
அறியாமல் இருப்பது ஆனந்தம்
அறிந்தால் போய்விடும் நிம்மதி

ஆசைப்பட்டேன்

 இத்திறமைக்கே ஆசைப்பட்டேன்
கை வரத்தான் அது மறுக்கிறதே
செடியில்லை நீர் விட்டு வளர்க்க
ஆடில்லை இலை தழை கொடுக்க
எப்படித்தான் நான் வளர்ப்பேன்
வக்கணையாய் கவிதை வடிப்பேன்