பாரீர் பாரீர்

 பாரீர் பாரீர் பாரெனும் நாடகமேடையில்
பவுமானமாய் அரங்கேறும் பூனை நடையினை
திருப்தியின் திசை தெரியா பேராசைக்காரர்
ஈகையின் ஈரம் அறியா சுயநலவாதிகள்
பகையை மறைத்து பல்லை இளிக்கும் பாசாங்குக்காரர்
கண்ணை விற்று ஓவியம் வாங்கும் மூடர்கள்
கதையை திரித்து கல்லா கட்டும் ஊடகக்காரர்
விரசம் நாடும் சிற்றின்ப சித்தர்கள்
அதிகார மமதையில் ஆடும் அதிகாரிகள்
ஆன்மீக போர்வையில் திளைக்கும் காமுகர்
பண்பாடுகளை பறக்கவிடும் புரட்சியாளர்
உறவுக்கு புதுப் புது அர்த்தங்கள் சொல்லும் மேதைகள்
புனிதத்தை கடைச்சரக்காக்கும் பேதைகள்
தூண்டிலில் சிக்கும் மீன்கள் விளக்கில் வீழும் விட்டில்கள்
மக்கள் சேவை செய்ய வந்த பொய்யர்கள்
மந்தைகளாய் ஆக்கி கொழுத்த கபடதாரிகள்
கஜானாவை நிரப்புகின்ற சிறந்த குடிமகன்கள்
செல்ஃபோனுடனே வாழுகின்ற தனித்தீவுகள்
கொட்டிக்கிடக்கும் இயற்க்கை அழகை ரசிக்காத ஜன்மங்கள்
கணம் கணமாய் வாழ்க்கைத் தேனை ருசிக்காத ஜீவன்கள்
வேடிக்கை மாந்தரின் விந்தையான அணிவகுப்பு
கேளிக்கை ஆனதோ விலையில்லா வாழ்க்கையிங்கு