வயித்தெரிச்சல்

 கை நிறைய காசு புரண்டதுமே

ஹார்மோன் செய்த சேட்டையிலே
வாலிப வயது வேட்கையிலே
வித விதமா அனுபவிக்கயெண்ணி

கலர் கலரா கனவு கண்டேன்
காலாகாலத்தில் வந்த ஒரு
கல்யாண ஆசையிலே நான்
கிறு கிறுத்துப் போயிருந்தேனே

உறவுக்குள்ள பெண்ணிருக்க
வேண்டாமுன்னு உதறிப்புட்டு
நாகரிக பொண்ணு வேண்டி
நாலு பக்கம் தேடியலைஞ்சி

பட்டணத்துப் பாவையை
படித்த மாமேதையை
பதமா கைபிடிச்சேன்
பாங்கா வாழவந்தேன்

சின்ன இடையில் சென்ட்டு மணத்தில்
நளினமான நடை உடையில்
நுனி நாக்கு ஆங்கிலத்தில்
தேன் குடித்த நரியானேன்

நாளாக நாளாக குடித்தனம்
பழகப் பழகப் புரியுது
பல விஷயம் தெரியுது
ஆழமான கடலிது

அரைக்கால் டிரெளசரும்
தொள தொள பனியனும்
கருப்புக் கண்ணாடியும்
காரிலே சவாரியும்

பவுசாத்தான் இருக்குது
பாத்த கண்ணு வெறிக்குது
பசி அதுல அடங்குச்சா
பதில்தானே தெரியல

பாவிப்பய அடிமனசில
படிஞ்சி போன ருசிகள
புரட்டிப்போட முடியலியே
பழசயெல்லாம் மறக்கலையே

நூல் நூலா நூடுல்ஸ
முள்ளு கரண்டியோட வைக்கிறா
நொந்து நூலா போனேனே
நாக்கு செத்துப் போனதே

கல்லு கல்லா இட்டிலி
உப்பு உரப்பில்லா சட்டினி
மஞ்சத்தண்ணியா சாம்பாரு
நல்லாயிருக்கான்னு கேக்குறா

வேகாத தோசையைப் பாத்து
நாந்தான் வெந்துபோனேனே
பூரி சுடவும் தெரியல
கிழங்கு வாய்க்கு விளங்கல

வாயால தாளிச்சா போதுமா
கடுகு உளுந்து பொரிச்ச வாசன வரல
எள்ளும் கொள்ளும் முகத்துல வெடிக்காம போகல
என்னை வறுத்து எடுக்குறா

என்னத்த நான் சொல்ல
மெல்லவும் முடியல
முழுங்கவும் முடியல
முடியுமா இந்தக் கொடுமை

சுள்ளாப்பா புளிக்குழம்பும்
அரைச்சு வச்ச துவையலும்
ஆத்தா உன் கைமணமும்
நினச்சு நினச்சு வேகுறேன்

உள்ளத சொல்ல முடியுமா
யுத்தம் வெல்ல முடியுமா
பங்கு போட வந்தவளை
பகைச்சுக்கொள்ள முடியுமா

சொல்லிக்குடுக்கக் காத்திருக்கா
சுமந்து வளத்த பொம்பள
ரோசம் ரொம்ப பாக்குறா
சுமக்க வந்த பொம்பள

ஆம்பளயில்லாம புள்ள பொறக்குது
ஆம்பளக்கி புள்ள பொறக்குது
மாறிப்போன கலிகாலத்துல
மாறலியே பொம்பள புத்தி

இருந்தும் இல்லாதவனானே
கைக்கெட்டியது வாய்க்கெட்டலியே
நாக்கை வளத்துக் கொண்டதால
வந்ததிங்கே வயித்தெரிச்சல்

முள்ளில் விழுந்த சேலையா
முட்டாளா முழிக்கிறேன்
முழுசா பிழைப்பேனா
மூச்சு முட்டி சாவேனா