அங்கிங்கெனாத புது விதத்திலே எங்கெங்கு காணினும் சக்தியடா
திறந்த மேனியாய் நிற்கிறாள்
கவர்ச்சியாய் அவளிருக்கிறாள்
கண்ணை சுண்டியிழுக்கிறாள்
கருத்தைத் தொலையச் செய்கிறாள்
வண்ண வண்ண விளம்பரங்கள்
எண்ணற்ற பொது இடங்கள்
சாலைகள் விற்பனை கூடங்கள்
சஞ்சிகைகள் பலதர நாளிதழ்கள்
சின்ன பெரிய வெள்ளித் திரைகள்
சிறுத்த உலகின் மூலை முடுக்குகள்
கண் கூசும் விரச காட்சிகள்
காது கூசும் ஆபாச வரிகள்
அவளை சுற்றி அடிக்கும் கும்மிகள்
வர்த்தகர் குறி பொற்காசுகள்
ஊடகத்தின் சத்தமான ஓசைகள்
காமத்தின் கட்டவிழ்த்த ஆசைகள்
ஒழுக்கம் தொலைத்த தேவைகள்
ஒத்துழைக்கும் ஒப்பனை பாவைகள்
அவர்களுக்கில்லை ஏதும் வருத்தங்கள்
மரத்துப்போனதவர்கள் உணர்வுகள்
மானத்தை உதிர்த்த கவரிமான்கள்
வலையை அறியாத செம்மீன்கள்
பாதிக்கப்படுவதோ பேதைகள்
பாதுகாப்பில்லாத குமரிகள்
அப்பாவி பிஞ்சு சிறுமிகள்
வெறிநாய்களின் சுலப இரைகள்
வாழ்வை தொலைக்கும் அபலைகள்
வடுவை சுமக்கும் அவலங்கள்
எதிர்பாராத பேராபத்துக்கள்
எழுதவொண்ணா பரிதாபங்கள்
யாரோ செய்யும் பாவங்கள்
எவரோ அடையும் லாபங்கள்
எங்கோ கடலடியில் பூகம்பங்கள்
கரையோரம் நடக்கும் பேரழிவுகள்
No comments:
Post a Comment