ஏதோ ஏதோ எதிர்பார்ப்பு
எங்கும் எதிலும் பரபரப்பு
மெல்ல மேகம் திரண்டது
வெட்டி வெட்டி மின்னியது
கடகடவென உருட்டியது
வானம் சிவந்து கிடந்தது
ஆயத்தம் பலமாய் நடந்தது
பருவமழையின் அரங்கேற்றம்
அற்புதமாய் அங்கு துவங்கியது
அமர்க்களமாய் தொடர்ந்தது
சாரல் தூறல் வலுத்தது
நனைய நனைய பெய்தது
நாளும் இது தொடர்ந்தது
நடப்பாய் பழகிப்போனது
பல நாள் இதுதான் வாடிக்கை
சில நாள் கனமழை வேடிக்கை
ஊஊவென காற்று சுழன்றது
சடசடவென மழையடித்தது
பேயாய் மரங்கள் ஆடியது
குளிரக் குளிர ஊறியது
இதமாய் பதமாய் ஓர் சுகம்
இறுக்கம் மறைந்து போனது
பூமியின் தாகம் தீர்ந்தது
நீரை மடியில் சேமித்தது
காற்றும் கடலும் மலையும்
சேர்ந்து நடத்தும் நாடகம்
இனிய இயல்பான சுழற்சி
இயற்கையின் மறுமலர்ச்சி
மண்ணில் மனதில் ஈரம்
வறட்சி விலகும் தூரம்
சிறகை விரிக்கும் கற்பனை
சிந்தும் சிங்கார வர்ணனை
வானிலே நடந்தது விழாக்காலம்
விளைந்ததோ வண்ணக்கோலம்
பூமகள் பூணுவாள் பட்டாடை
மணநாள் மங்கையின் சாடை
விழிகளில் விரிந்தது விருந்து
வருந்திய இதயத்தின் மருந்து
ஆண்டிற்கு ஒரு முறை உற்சவம்
அடுத்த முறை வரை உற்சாகம்
Subscribe to:
Post Comments (Atom)
No comments:
Post a Comment