மீதம்

இன்னும் ஏதோ உளது
அறியாத சுவை ஒன்று
காணாத சுகம் ஒன்று
என்னும் வரை ஈர்ப்பு
இன்றே உண்டு முடித்து
அணைத்துக் களைத்து
பழகிப் பழசான பின்னும்
புதிதாய் பூத்து நின்று
புதிராய் திகைக்க வைத்து
புரட்டாத பக்கத்தைப் படிக்க
அழைத்துக்கொண்டேயிரு
திகட்டாத தெள்ளமுதாய்
தித்திக்க வேணும் தினமும்
பெண்ணே முழுதாய் காட்டாதே
மொத்தமாய் அவிழ்க்காதே
மீதம் நாளை விருந்தாகட்டும்
கடைசித் துளி காதலுக்கில்லை